ROXAS CITY – Patay ang isa ka lalaki matapos ginluthang sa sulod sang bulangan sa Sitio Cabutungan, Brgy. Conciencia, Panit-an, Capiz takna alas 3:55 kahapon sang hapon, Enero 7, 2024.
Ginkilala ang biktima kay “alyas Lloyd” yara sa legal nga pang-edaron kag residente sang Brgy. Agkilo, sang nasambit nga banwa.
Sa impormasyon nga nagikan sa Panit-an Municipal Police Station, ginapahayag samtang nagatindog kag nagalantaw ang biktima sa sulod sang bulangan, ginluthang ini sang tatlo ka beses sang mga suspetsado nga sanday alyas Ryan, alyas Nene kag alyas Boyet sang wala pa matumod nga kalibre sang armas-luthang.
Naigo ang biktima sa magkatuhay nga parte sang iya lawas kag gindala ini sang Panit-an BFP sa Bailan District Hospital agud dapatan kun tani sang medikal nga atensyon apang ginbawian ini sang kabuhi.
Ginpahayag nga antes natabo ang pagpangluthang, may natabo nga pagbinaisay sa tunga sang biktima kag mga suspek.
Narekober sa ginluntaran sang insidente ang apat ka unfired cartridge sang kalibre 45 nga armas-luthang.
Samtang, nagpalagyo ang mga suspek sa wala matumod nga direksyon.
Sa karon, padayon ang hot pursuit operation sang mga kapulisan batuk sa mga suspetsado.
