ROXAS CITY – Nagapabilin sa kritikal nga kundisyon ang 44-anyos nga lalaki nga ginbulus bulusan labo sang tatlo ka mag-utod sa Sitio Sinamungan, Barangay Bangon-Bangon, Sigma, Capiz.
Ginkilala ang biktima nga si Richard Voluntad sang amo nga lugar.
Ba-Se sa imbestigasyon sang Sigma Municipal Police Station sakay ang biktima sa iya motorsiklo sang hinali nga ginlabo sang mag-utod nga sanday Ricky, Ronnie kag Edwin Baliscot sang Barangay Duyoc, Dao, Capiz.
Nag-angkon sang pilas sa likod ang biktima sa diin una nga gindala sa Senator Gerardo Roxas District Hospital apang gintransfer sa Capiz Doctor’s hospital agud madapatan sang nagakaigo nga pagbulong.
Natalana naman nga pasakaan sang kaso ang tatlo ka mag-utod nga nakahunong na karon sa karsel sang Sigma PNP.
Samtang nagaguwa nga madugay na nga hiligut-anon ang motibo sa paglabo sang mga suspek sa biktima.
