DAO, CAPIZ- Patay ang isa ka lalaki samtang nagamaneho sang iya nga motorsiklo sa Barangay Nasunugan, Dao, Capiz.
Ang nasambit nga lalaki amo si alyas ‘Jeriko’, 23-anyos kag residente sang Barangay Poblacion Ilaya sa amo man nga banwa.
Sa impormasyon nga nakuha sang Bombo Radyo nagikan sa Dao Municipal Police Station, ginpahayag nga samtang ginamaneho sang driver ang iya motorsiklo hinali nalang ini nga nag swerve kag nadulaan sang kontrol rason nga natumba ini.
Dugang pa diri, ang amo nga biktima ang nagikan sa Barangay Manhoy sang nasambit nga banwa kag padulong kuntani sa barangay Nasunogan sang natabo ang nasambit nga insidente.
Bangud sa makusog nga impact sang pagkatumba, nag-angkon sang patal nga pilas sa ulo ang biktima nga gilayon naman nga ginpadangat sa Dao District Hospital apang gindeklarar ini nga ‘dead on arrival’ sang doktor nga nag-atendir.
Sa karon, yara na sa isa ka punerarya sa nasambit nga banwa ang bangkay sang biktima.
