Pilason ang isa ka lalaki matapos ginbuno sang iya kaupod sa ilimnan sa Barangay Duyoc, Dao, Capiz.
Ginkilala ang biktima kay alyas ‘Robinson’ samtang ang ginatudlo naman nga suspek ang ginkilala kay alyas ‘Marlon’, lunsay mga residente sa nasambit nga lugar.
Sa nakuha nga impormsyon sang Bombo Radyo nagikan sa Dao Municipal Police Station, ginpahayag nga samtang naga-inom-inom ang biktima kag ang suspetsado, hinali nalang nga may nagluntad nga komosyon kag indi pag-intindihanay sa suspek kag kaupod sini sa ilimnan.
Dugang pa nga luyag lang kun tani sang biktima magtambag sa mainit nga pagbinaisay, apang hinali nalang nga nag-hugnot sang kutsilyo ang suspetsado kag ang biktima ang na-igo kag nag-angkon sang pilas sa iya tiyan.
Gilayon naman nga ginpadangat ang biktima sa Dao District Hospital para sa nagakaigo nga pagbulong samtang gin-aresto naman sang nagresponde nga mga kapulisan sa lugar ang nasambit nga suspetsado.
Nahibaluan nga yara sa idalom sang impluwensya sang makahulubog nga ilimnon ang magtimbang nga bahin sang natabo ang insidente.
Sa karon, yara na ang suspek sa kustodiya sang Dao MPS para sa nagakaigo nga disposisyon.
