Wala sang legal nga basehan ang gobyerno sang Pilipinas nga i-surrender ang sin-o man nga Filipinos sa International tribunal kaangay sang International Criminal Court (ICC).
Ini ang ginpahayag ni Atty. Israelito Torreon, legal counsel ni Senator Ronald “Bato” Dela Rosa bangud wala sang may naga-eksister nga rules sa Pilipinas nga makapaathag sa kun paano i-surrender kag i-turn over ang Filipino sa ICC.
Suno kay Torreon, ang layi nga makagiya sa nasambit nga proseso kuntani amo ang Republic Act 9851 ukon ang The Philippine Act on Crimes Against International Humanitarian Law, Genocide, and Other Crimes Against Humanity.
Apang ang nasambit nga layi ang wala pa sang Implementing Rules and Regulations (IRR), ang detalyado nga set sang pagsulondan nga kinahanglan sundon sang government agencies sa kun paano ipatuman ang layi.
Kun wala sang IRR, pahayag ni Torreon, wala sang maathag nga legal process nga mahimo sundon sang gobyerno kun luyag i-surrender sang gobyerno ang sin-o man nga tawo kaangay ni Dela Rosa sa International Criminal Court.
Una na nga ginpahayag sang Department of Justice nga kun mag-issue man sang arrest warrant ang ICC, obligado ang gobyerno sang Pilipinas nga ipatuman ini.
Buot silingon, mahimo nga maaresto si Dela Rosa kag i-extradite ukon i-surrender sa idalom sang Section 17 sang RA 9851.
Apang nagapamatok si Torreon diri. Suno sa iya, indi magamit ang Section 17 bangud nagasiling ini nga dapat sundon ang “applicable laws and treaties.”
Ginpahayag sang abogado nga ang rules kag treaties ang wala na subong naga-eksister kag indi na aktibo pa, rason nga wala na sang epekto ang amo nga section.
Nagpaandam man si Torreon sa gobyerno nga mangin iligal kag unconstitutional ang pag-surrender nga wala sang amo nga pagsulondan.
Gin-athag sang natungdan nga ang paghatag sang isa ka Filipino citizen sa international court ang indi lang desisyon sang Presidente ukon sang ahensya sang gobyerno bangud ini ang makabig nga seryoso nga tikang nga kinahanglan suportado sang maathag nga layi kag due process.
