Nagpahanumdom ang isa ka legal expert sa publiko nga dapat may ihibalo ang kada isa sa intestate succession kun sa diin bala nagakadto ang mga propedad kun magtaliwan na ang tawo.
Sa interview sang Bombo Radyo kay Atty. Edryl Ranido sang Intergrated Bar of the Philippines (IBP) Capiz Chapter, iya ginpahayag nga kinahanglan mahibaluan ang proseso sang intestate succession , sa kun sin-o bala ang nagkadapat nga manubli sa tion nga wala sang nabilin nga kasulatan ukon last will and testament ang nagtaliwan.
Suno kay Ranido, kun wala sang last will and testament nga ginbilin ang isa ka tawo , ipaagi sa gihapon sa operation of law ang pagdesisyon kun sin-o ang manubli sang propedad kag may yara sang pagpasunod santo sa Civil Code .
Mahimo nga manubli amo ang mga legitimate children kag descendants, ginikanan kag ascendants, bana ukon asawa, mga utod, hinablos, kag iban pa nga himata tubtob sa 5th degree apang kun wala sang himata, ang propedad magakadtu sa estado ukon gobyerno.
Pahayag pa niya, kinahanglan nga kumpleto ang mga dokumento kaangay sang death certificate,land title,tax declaration kag mga bank statement bangud ang intestate succession indi lang nahanungod sa mga kadutaan kundi pati na ang kwarta nga nabilin.
Dugang pa sang nagtungdan, indi kwarta kag propedad ang pinakamahal nga panublion sa baylo amo ang kalinong kag pagbinuligay sang pamilya.
