Nagpagwa sang memorandum ang Local Government Unit sang President Roxas, Capiz agud pangayuan sang written explanation ang Punong Barangay sang Brgy. Cabug-Cabug may kaangtanan sa pagbutang sang mga tarpaulin nga nagadeklarar sang isa ka karsada bilang “private property.”
Sa interview sang Bombo Radyo kay President Roxas Capiz Mayor Receliste Escolin, iya ginpahayag nga indi nagakadapat nga pagabutangan sang amo nga tarpaulin ang daan sa lugar bangud isa ini ka provincial road nga para sa publiko.
Suno pa sa alkalde, wala sang bisan sin-o nga may kinamatarong nga magadumili sa mga pumuluyo nga maglabay ukon mag-agi sa nasambit nga karsada kon ini iya sang gobyerno.
Nagalaom man si Escolin nga sabton sang Punong Barangay ang memorandum kag magsumite sang iya nga written explanation sa natalana nga tion.
Samtang, bukas naman ang talatapan sang Bombo Radyo sa pagpaathag sang Punong Barangay sang Brgy. Cabug-Cabug.
