ROXAS CITY – Ginakabig nga isa ka buhi nga superwoman ang isa ka lola nga residente sang Barangay Najus-an banwa sang Mambusao, Capiz matapos nga nagsaulog sang iya ika-100 nga kaadlawan sang Disyembre 15 sining tuig.
Ginsaysay ni Estelita Labanza Ocbeña ukon mas kilala nga Lola Litang ang pila ka mga sikreto kun paano ini nagapabilin nga mabakud sa pihak nga nagaedad na ini.
Sa exclusive interview sang Bombo Radyo Roxas kay Lola Litang nga pagkaon lamang sang masustansya nga utanon kapareho sang gabi, kangkong, ugbos sang kamote kag iban pa ang ginakaon sini kun sa diin nagapabilin ini nga mabaskog adlaw-adlaw.
Dugang pa sini nga makaya pa niya nga magsaot kag magkanta sa tion nga makabati ini sang dumaan nga mga ambahanon.
Wala man sini mapunggan nga magpakigbahin angut sa naagyan sini nga kapigaduhon matapos nga wala makatapos sa pag-eskwela bangud man wala ini ginpasugtan sang iya mga ginikanan sang una nga tyempo. .
Mahibaluan nga nabun-ag si Lola Litang sang Disyembre 15, 1920 kun sa diin naabutan pa sini ang World 1 kag World War 11.
Suno pa diri nga naagyan pa sini ang isa ka pandemya sang nakaligad nga mga dekada.
Ginpahayag sini nga ginkasal ini sa edad nga 19 kay David Ocbeña, isa ka beterano nga suldado diri sa probinsya sang Capiz kun sa diin ginbugayan sila sang walo (8) ka mga kabataan kag 28 ka mga apo.
Dugang pa sini nga masami ini nga nagapadulong sa mga binaylehan kabangdanan nga diri niya nakilala ang iya labing una nga kahagugma sa edad nga 15 anyos nga sang ulihi nangin bana sini.
Nadumduman man sini nga tuig 1991 ginbawian sang kabuhi ang iya bana bangud man sa ginasuprer nga sakit.
Ginakilala naman ini sang iya mga kabataan kag ka-apohan bilang isa ka mabuot, mapinalanggaon kag masinadyahon nga asawa, iloy kag lola.
Nagapasalamat naman si Lola Litang sa mga myembro sang pamilya sini nga wala untat nga nagatatap sa iya.
