Ginalauman nga magakusog pa ang Low Pressure Area (LPA) nga nasiplatan sa sidlangan sang Surigao del Sur, suno sa Philippine Atmospheric, Geophysical and Astronomical Services Administration (PAGASA). Sa tion nga ini ang nangin isa ka ganap nga bagyo, pagatawagon ini nga “Jacinto.”
Suno kay Philippine Atmospheric, Geophysical and Astronomical Services Administration (PAGASA) weather specialist Obed Badrina, ang LPA ulihi nga nasiplatan sang las-3 sang kaagahon sa kalayuon nga 445 kilometro sidlangan sang Hinatuan, Surigao del Sur.
Nagahulag ang LPA padulong sa Visayas kag Mindanao, kag ginalauman nga magadala ini sang magal-umon nga kalangitan nga may palapta-lapta nga pag-ulan kag pagkidlat-panaguob sa Eastern Visayas, Central Visayas, Caraga, Northern Mindanao, kag Davao Region subong nga adlaw. Nagpaandam ang PAGASA sa posible nga pagbaha kag pagtiphag sang duta bangud sa kasarangan tubtob makusog nga pag-ulan.
Sa outlook sang PAGASA, ginalauman nga magahulag ang LPA — ukon Jacinto pananglitan nga magakusog ini — pa-northwest pag-abot sang Lunes, nga posible nga makaapekto sa mga bahin sang Visayas kag Mindanao. Mahimo man ini magtaas sang Tropical Cyclone Wind Signal kun padayon nga magakusog ang sistema.
Padayon nga ginamonitor sang PAGASA ang hulag kag kusog sang LPA kag ginpahanumduman ang publiko nga mangin alerto kag bantayan ang mga masunod nga report angut sa lakat sang panahon.
