ROXAS CITY – Hilway na sa kustodiya sang National Bureau of Investigation (NBI) Capiz District ang nadakpan nga nagpatigayon sang Double your money investment scam sa probinsya.
Sa interview sang Bombo Radyo kay Agent John Katipunan, Deputy Executive Director sang NBI- Capiz, ginkumpirmar sini nga ginhilway na si Cherrie Cartujano alyas ‘Madam Cherrie’ nga residente sang Brgy. Balijuagan, Roxas City, matapos nga nakapiyansa para sa temporaryo nga kahilwayan sini.
Wala man ginpahayag ni Katipunan kun pila ang kantidad sang nasambit nga piyansa.
Suno pa diri, nahulog sa simple estafa ang kaso ni ‘Cherrie’ nagikan sa wala kuntani sang piyansa nga large scale estafa, bangud nag-aku si ‘Cherrie’ nga wala sang kahilabtanan ang apat pa sini ka mga kaupdanan.
Ginbuyagyag man sini nga may yara gid ini sang ‘boss’ isa ka taga-Capiz kag isa nga taga-Iloilo.
Matandaan nga nadakpan si Cartujano sa ginkasa nga entrapment operation sang NBI-Capiz sa banwa sang President Roxas, sang tinalikdan nga Disyembre 2, matapos nga may nagdangop sang reklamo sa talatapan sang NBI natuhoy sa operasyon sang double your money investment sa Capiz.
Nauna man nga ginhilway ang apat ka iban pa matapos ang pag-aku ni Cartujano sa iligal nga bulohaton.
