ROXAS CITY— Presuhan ang ginsudlan sang maglive-in partner matapos madakpan sa drug buy bust operation sa Barangay 11, Roxas City.
Ginkilala ang mga suspek nga sanday Bobby Lee, 35-anyos kag live-in partner nga si Llena Asas 30-anyos.
Sa interview sang Bombo Radyo kay PSI Pedro Diocson, hepe sang Station Drugs Enforcement Unit sang Roxas City PNP, ginpahayag sini nga kalakip sa listahan sang street value target si Lee apang karon nag-level up na ini sa High Value Target drug personality matapos nabuyagyag nga bilog na nga probinsiya sang Capiz ang sakop sang iya nga operasyon.
Suno kay Diocson nga nabudlayan sila nga madakpan si Lee bangud maayo ini magpang lita lita sang ka-transaksyon.
Samtang nakuha sa posesyon sang duha ang walo ka sachet sang ginapatihan shabu kag P500 nga marked money nga lunsay naman ginpanginwala sang duha.
