Hugot nga ginsiling ni House Committee on Public Accounts Chairman Terry Ridon nga indi dapat mag-untat ang imbestigasyon sang Independent Commission for Infrastructure (ICI) kag Ombudsman sa alegasyon sang korapsyon sa mga proyekto sang flood control.
Suno kay Ridon, kinahanglan magpadayon ang imbestigasyon apisar nagbuya na sa puwesto sanday Executive Secretary Lucas Bersamin kag Budget Secretary Amenah Pangandaman.
Pahayag sang Malacañang, ang ila nga pagbuya ang naka-base sa prinsipyo sang delicadeza agud masigurodo ang isa ka hilway kag wala sang may ginadampigan nga imbestigasyon.
Ginhatagan pagtamod ni Ridon nga obligasyon sang ICI kag Ombudsman nga mausisa sang maid-id ang posible nga salabton sang mga nag-resign nga opisyal, subong man ang iban pa nga sangay sang ehekutibo nga nasambit sa affidavit kag testimonya ni anay DPWH Undersecretary Roberto Bernardo kaangot sang alegasyon sang korapsyon.
