ROXAS CITY – Dead on arrival sa ospital ang isa ka mamumugon matapos ginaalegar ginlampusan sang kahoy sang makapila ka beses takna 11:30 sang aga, Disyembre 9 sa Barangay Taft, Tapaz Capiz.
Ginkilala ang biktima nga si alyas ‘Mesio’, 51-anyos samtang ang suspek amu si alyas ‘Onyok’, 54-anyos lunsay residente sang nasambit nga lugar.
Sandig sa imbestigasyon sang Tapaz PNP, samtang yara sa sulod sang rice warehouse si alyas ‘Onyok’ hinali na lang nag-abot si alyas ‘Mesio’ nga ginaalegar yara sa impluwensya sang makahulubog nga ilimnon, sang nagluntad ang pagbinaisay.
Bangud sini, ginapahayag gulpi na lang ginlampusan sang kahoy sang biktima ang suspek nga gintunaan sa pagkapilas sang natuo nga kilay ni ‘Onyok’.
Diri na nagdinumugay ang duha tubtob nakuha sang suspek ang kahoy kag ginaalegar ginlampusan ang biktima sang makapila ka beses sa nagkalain-lain nga parte sang lawas.
Gindala pa sa Tapaz District Hospital si ‘Mesio’ apang ginbawian ini sang kabuhi.
Samtang, na-aresto naman ang suspek sa bulig sang 602nd Coy, RMFB 6 nga nakabase sa lugar.
