Nagpagwa sang precautionary hold departure order (PHDO) ang Branch 52 sang Manila Regional Trial Court batuk kay Senador Jinggoy Ejercito Estrada kag pila ka mga anay opisyal sang Department of Public Works and Highways (DPWH) may kaangtanan sa mga kaso sang plunder kag maanomaliya sa flood control projects sa Bulacan.
Ang mando gin-isyu sang Pebrero 10, 2026 sa idalom ni Presiding Judge Juan Ranola Jr., kag ginmanduan ang Bureau of Immigration nga ilakip ang mga ngalan sa listahan sang HDO agud indi sila makahalin sa pungsod samtang ginahulat ang kaso.
Kalakip sa mga ginhingadlan sa amo sanday Former DPWH Secretary Manuel Bonoan, Former Undersecretary Roberto Bernardo, kag district engineers nga sanday Henry Alcantara kag Gerard Opulencia.
Nalakip man sa listahan si DPWH Undersecretary Cathy Cabral, nga nagtaliwan sang Disyembre 2025, bilang kabahin sang orihinal nga mga respondents.
Suno sa Department of Justice (DOJ), kabahin ang nasambit nga lihok sa pagpasiguro nga atubangon sang mga akusado ang proseso kag indi makapalagyo sa pungsod.
Samtang, nagpasaka naman sang counter-affidavit si Former DPWH Secretary Bonoan kag nagpabutyag sang tuyo sini nga magpadulong sa Estados Unidos sa tunga sang kaso.
Base sa report sang Commission on Audit (COA), may yara sang P275 million nga balor sang flood control projects sa Bulacan nga may mga iregularidad, nga nangin basehan sang imbestigasyon.
Ginahatagan pagtamod sang DOJ nga ang PHDO isa ka preventive measure agud mapabilin ang integridad sang proseso sang hustisya.
Sa subong, natalana nga ipadayon sa masunod nga mga binulan ang hearing sang mga kaso nga ginpasaka batok kay Estrada kag sa pila ka mga anay opisyal sang Department of Public Works and Highways.
