Mahimo nga magpangatubang sang mga kaso nga plunder kag indirect bribery sanday former Speaker Ferdinand Martin Romualdez kag former Ako Bicol party-list Representative Zaldy Co bangud sa mga maanomaliya nga flood control projects.
Ini ang ginpahayag ni President Ferdinand Marcos Jr. sa isa ka video message.
Suno sa Presidente, ang mga impormasyon kag ebidensya nga nakaptan sang Independent Commission for Infrastructure kag Department of Public Works and Highways batuk kanday Romualdez kag Co ang ipasa sa Office of the Ombudsman para sa dugang nga imbestigasyon.
“Nais kong [ipaalam] sa ating mga kababayan na ang ICI at tsaka ang DPWH ay lahat ng nakuha nila na impormasyon ay i-rerefer, ibibigay na sa Ombudsman para imbestigahan ng Ombudsman. Ito ay tungkol sa mga impormasyon ng Dating Speaker Martin Romualdez at tsaka ni Zaldy Co,” pahayag sang president.
Suno kay Marcos, sa tion nga makita na ang tanan nga ebidensya , posible nga mag-file sang kaso nga plunder, anti-graft, ukon indirect bribery.
Nahibaluan nga gin-deny ni Romualdez ang iya kahilabtanan sa flood control project anomalies sa diin gin-angot siya sang mag-asawa nga Curlee kag Sarah Discaya sa Senate inquiry may kaangtanan sa kontrobersiya sa flood control.
Nagligad nga semana, gin-akusaran man ni Co sanday Marcos, Romualdez kag pila ka mga myembro sang gabinete bangud sa ginaalegar insertions ang P100 billion sa national budget.
