Ginalauman nga magadugok ang masobra 2.2 million nga pasahero sa mga terminal sa Ninoy Aquino International Airport (NAIA) sa kasagsagan sang holiday season.
Ginpahayag sang New NAIA Infra Corp. (NNIC) nga yara sa 2.296 million nga pasahero ang ginalauman halin Disyembre 20, 2024 tubtob Enero 3, 2025 nga nagapakita sang 10.95% nga pagtaas kun ikumparar sa pareho nga period sadtong 2023.
Ginalauman man nga malampuwasan ang numero sang mga pasahero kag flights nga nabalhag sadtong Undas kag sa pareho nga period sadtong 2023.
Bilang sabat, ginpahayag sang kompaniya nga nagapreparar na sila sa pagdugok sang mga pasahero sa airport terminals pinaagi sa pagpatuman sang measures kasubong sang pagpataas sang ila nga staff, pagpalawig sang terminal operations kag pagpasangkad pa sang security protocols.
Nakig-angut naman ini sa iban pa nga mga concerned government agencies. Ginapanugyanan naman ang mga pasahero nga sundon ang baggage instructions kag restrictions para sa mas madasig nga security screening kag mag-abot sang mas timprano antes ang flight agud malikawan ang anuman nga aberya.
