Naglab-ot na sa kapin 9,500 ka classrooms sa bilog nga pungsod ang nadamage bangud sa ginpabakod nga Southwest Monsoon ukon Habagat kag sa mga nagligad nga bagyo, suno sa Department of Education (DepEd).
Base sa pinakabag-o nga assessment sang DepEd, 1,594 ka eskwelahan ang naapektuhan, samtang 9,597 ka classrooms ang nakabaton sang minor tubtob major damage.
Pinakadaku ang kahalitan sa Central Luzon, diin 3,596 ka classrooms sa 412 ka eskwelahan ang naapektuhan. Naglab-ot naman sa 126,584 ka learners sa rehiyon ang naapektuhan sang mabaskog nga ulan kag pagbaha.
Sa Central Luzon, ang Pampanga ang may pinakadamo nga nadamage nga classrooms nga naglab-ot sa 1,689, nga ginsundan sang Bulacan nga may 933.
Suno kay Education Secretary Sonny Angara, nagapanguna nga prayoridad subong sang ahensya ang seguridad sang mga estudyante kag mga manunudlo, samtang ginapanikasugan nga mapabakod ang epekto sang kalamidad sa ila pag-eskwela.
Kinahanglan sang DepEd ang inisyal nga P318.01 milyon para sa minor repairs kag cleanup sang 1,594 ka naapektuhan nga eskwelahan.
Sa Central Luzon lamang, ginabulubanta nga P109.71 milyon ang kinahanglan, lakip na ang P12.69 milyon para sa debris cleanup kag sanitation kag P97.02 milyon para sa minor repairs sang 1,980 ka classrooms.
Magakuha ang DepEd sang pondo halin sa Disaster Preparedness and Response Program, kag mangayo man sang special budget request sa Department of Budget and Management.
Nakig-angut man ang ahensya sa Department of Labor and Employment (DOLE) agud magamit ang Tulong Panghanapbuhay sa Ating Disadvantaged Workers (TUPAD) para sa paglimpyo kag clearing operations sa mga eskwelahan.
Samtang, ginabulubanta nga maglab-ot sa P2.604 bilyon ang kinahanglan nga pondo para sa major repairs kag reconstruction sang mga eskwelahan sa bilog nga pungsod.
