ROXAS CITY – Ginkumpirmar ni Mayor Edgardo Arancillo sang banwa sang Dumarao nga may yara na sang schedule sang releasing sang financial assistance sa Bagyong Odette pinaagi sa DSWD sa ila nga banwa.
Ini matapos nga may nagapalapta sang istorya nga ginbalibaran sang alkalde ang pondo sa nasambit nga ayuda.
Sa interview sang Bombo Radyo kay Arancillo, ginpahayag sini nga wala sila sang kinamatarong nga balibaran ang amu nga assistance.
Aminado man ang alkalde nga madamo sang nagareklamo sa listahanay apang pahayag sini nga dapat sa lebel sang barangay ang makasabat bangud sila ang mas nakakilala sa ila mga residente kun sin-o ang kwalipikado nga benepisyaryo kag indi.
Ginpunto man sini nga ila ginsunod ang guidelines kag wala sang bisan ano nga gindugang.
Pahayag sini nga nag-angkon sang gamay nga delay sa ila releasing bangud nagpatawag pa sang pagsinapol ang Liga ng mga barangay President nga si Punong Barangay Querubin Pamplona agud hitsuon ang gamay nga problema.
Ginpasalig sang alkalde nga sa masunod nga semana pagahiwaton ang pay-out sa ila banwa.
