ROXAS CITY- Indi nangin sablag ang kalayuon, madanlog kag madalom nga alagyan kag nagatagiti nga init sang adlaw para sa hubon sang LGU-Dao personnel sa pagpanguna ni Mayor Jose Jimbo Barruela kaupod ni Mrs Wildevina Jolampong and MSWDO staff nga mabisitahan sang personal kag ipalab-ot ang bulig nagikan sa munisipyo para sa mga Person with disability (PWDs) nga nagakinahanglan.
Isa-isa nga ginpadulongan sang alkalde kag mga kaupod sini ang panimalay sang 16 ka mga benepisyaryo nagikan sa Barangay Aganan, Balucuan, Duyoc, Matagnop, Nasunogan kag Pob. Ilaya para idul-ong ang 11 ka wheelchairs, 2 ka saklay kag 3 ka sungkod nga may kaupod nga cash.
Luyag gid ni Mayor Jimbo nga personal nga makita ang mga kasimanwa niya nga may kasablagan sa paglakat para makita ang ila sitwasyon kag mahibaluan ang ila dugang nga kinahanglanon.
Mainit nga hakos nga may kaupod mga wheelchair, sungkod ukon saklay kag cash ang nabaton sang mga maswerte nga PWDs gikan kay Mayor Barruela kadungan sa pagselebrar sang adlaw sang mga tagipusoon.
Halos indi matungkad ang nabatyagan nga kalipay sang mga nakabaton nga PWDs kag ila pamilya bangud natuman ang ila handum nga maka-atubang kag mahakos ang amay sang banwa.
Suno kay Mayor Jimbo, makabig nga mabinungahon, maduagon kag kompleto ang iya pagselebrar sang Valentine’s day bangud nangin kaupod niya ang mga nagakinanglan niya nga kasimanwa kag nahatagan siya sang kahigayunan nga maserbisyohan sila kag mapabatyag ang iya pagpalangga.
Pinaagi sa sining “Love on Wheels” nga programa, nagpangako ang alkalde nga pagatinguhaon sini nga mahatagan man sang kasubong nga ayuda ang iban pa nga PWDs kag matalapod ang tanan kun mahatagan ini sang kahigayunan nga mapalawig ang iya pagpangalagad sa iya pinalangga nga mga kasimanwa.
Sulong sa ikaayo Dao!
