Nagpakita sang mabakod nga koordinasyon, interoperability kag kahandaan sa pag-atubang sang krisis ang nagkalain-lain nga ahensya sang gobyerno sa tion sang Missile Attack Response Scenario sang Inter-Agency Territorial Defense Operations Exercise (ITDOEx) “Pag-ugyon 2026” nga ginpatigayon sa Brgy. Kirayan Takas, banwa sang Miag-ao, Iloilo sang Hunyo 16, 2026.
Sa simulation exercise, ginlaragway ang isa ka missile strike sa isa ka kampo militar sa Miag-ao nga nagresulta sa malapad nga pagkaguba sa mga malapit nga komunidad, pagkadula sang mga istruktura, madamo nga biktima kag mga insidente sang sunog.
Bilang sabat sa emerhensya, nagpatigayon sang operasyon ang mga partisipante nga ahensya. Ginpalig-on sang mga katapo sang militar ang depensa sang kampo paagi sa perimeter patrols, force protection measures kag pag-establisar sang mga depensable nga posisyon.
Samtang, ang mga medical responders nagdumala sang casualty management, naghatag sang madali nga bulig-medikal sa mga biktima kag nagsuporta sa search and rescue operations.
Ang mga personnel naman sang Bureau of Fire Protection (BFP) nagpatay sang mga sunog, naghatag sang first aid sa mga apektado kag nagsiguro sang luwas nga pagdala sa ila padulong sa mga pasilidad medikal.
Nagbulig man sila sa pagluwas sang mga sibilyan nga yara sa apektado nga lugar.
Sa pihak nga bahin, ginpagana sang Provincial government sang Iloilo kag sang Munisipyo sang Miag-ao ang ila tagsa ka Emergency Operations Centers (EOCs). Paagi sa ila Disaster Risk Reduction and Management Councils (DRRMCs), ginpatuman nila ang mga emergency response protocols, evacuation kag temporary shelter operations, mass casualty triage, kag padayon nga situation reporting kag inter-agency coordination agud suportahan ang mga tikang sang pagresponde.
Nagbulig man ang Philippine National Police (PNP) sa pagmintinar sang katawhay sang trapiko kag crowd control sa mga apektado nga lugar agud mapadayon ang pag-agi sang mga emergency responders kag ang luwas nga pagpatigayon sang search and rescue operations.
Ang sini nga scenario ginlaragway agud matestingan ang kolektibo nga kapasidad sang mga yunit militar, ahensya sang gobyerno kag local government sa pagsabat sa isa ka hostile missile attack kag sa mga epekto sini.
Gin-testingan man sini ang kahandaan sang mga emergency responders, bumbero, medical teams kag iban pa nga mga partisipante sa pagpatigayon sang search and rescue, paghatag sang emerhensya nga serbisyo medikal kag pagpatay sang sunog sa isa ka daku nga operasyon.
Ginpahayag nga ang tanan nga nagpartisipar nga ahensya sang gobyerno nagtuman sang ila tagsa ka contingency plans kag nagkoordinar sang ila mga aksyon suno sa nagapadayon nga mga protocol.
