ROXAS CITY-Ginkompirmar sang Focal Person sang Social Pension sang Department of Social Welfare and Development nga mahimo nga makakas ukon ma-islan ang mga benepisyaryo sang social pension apisar nga nakabaton na ini sang nasambit nga ayuda sang tinalikdan nga mga binulan.
Ini ang ginkompirmar ni Mrs. Judith Barredo sang mainterview sang Bombo Radyo.
Ginpahayag ni Barredo nga mahimo nga makakas ukon maislan ang daan nga benepisyaryo sa tion nga mahibaluan nga indi na ini kwalipikado apisar nga nakabaton pa ini sang nasambit nga ayuda sang tinalikdan nga mga binulan.
Suno kay Barredo nga ang ginabulos diri amo ang mga kwalipikado nga mga senior citizens nga madugay na nga nagahulat nga makasulod sa listahan ukon yara sa waiting lists.
Dugang pa ni Barredo nga ang naga validate sini amo ang mga social worker sang region office nga yara naga-opisina sa mga kabanwahanan sa probinsiya.
Matandaan nga nagreklamo sa waragwagan sang Bombo Radyo si Shirley Villanueva matapos nga ginkakas ang pangalan sini sa listahan sang mga benepisyaryo sang social pension nga makabaton sang tag P3,000 nga ayuda sa banwa sang President Roxas.
