ROXAS CITY-Ginatun-an sa karon ang pagbuhin sang mga contractual kag job order employees sa provincial government.
Ini ang ginkompirmar ni Provincial Budget Officer Mr. Antonio Arbis sang mainterview sang Bombo Radyo.
Ginpahayag ni Arbis nga bangud sa kakulang sang pondo, nagakinahanglan nga magbuhin sang mga contractual kag mga job order employees nga wala naman sang trabaho.
Suno kay Arbis nga daku ang posilibidad nga ang pila ka mga contractual kag Job order employees ang indi pag-irenew kag tubtob na gid lamang sa bulan sang Agosto.
Gindugang ni Arbis nga nagakinahanglan sang kapin P20 milyones nga pundo agud maka-renew ang mga nasambit nga empleyado tubtob sa bulan sang Disyembre.
Samtang, ginpanginwala ni Arbis ang alegasyon nga ang mga kontra partido nga mga empleyado ang indi pag-irenew.
Suno kay Arbis nga naga-base ang pagbuhin sa mga empleyado sa ila performance kag importansya sang trabaho.
Gin-athag man sini nga masami nga ginahimo ini nga tikang sang isa ka LGU sa tion nga may yara sang kakulang sa pondo.
