Ginpasidunggan ang mga kaparian sa probinsya sang Capiz paagi sa Faith and Service Awards bilang kabahin sang selebrasyon sang Diamond Jubilee kag Golden Jubilee sang Archdiocese of Capiz.
Ang pagpasidungog isa ka pamaagi sang pagpasalamat sa mga pari bangud sang ila daku nga kontribusyon sa pagpalapnag sang Pulong sang Diyos kag sa pagpakusog sang pagtuo sang mga tumuluo sa bug-os nga archdiocese.
Ginpangunahan ang nasambit nga aktibidad nanday Most Rev. Victor Bendico, D.D., Archbishop of Capiz, His Eminence Jose Cardinal Advincula, kag Most Rev. Charles Brown, D.D., Apostolic Nuncio to the Philippines.
Sa tion sang selebrasyon, ginhatagan pagkilala ang mga kaparian nga nagpakita sang matinumanon nga pag-alagad sa Simbahan kag sa komunidad, samtang ginpasalamatan man ang ila wala untat nga dedikasyon sa pastoral nga ministeryo kag sa espiritwal nga pagpanguna sa katawhan.
Ang Faith and Service Awards kabahin sang mga aktibidad nga nagapadayon sa pagsaulog sang importante nga mga anibersaryo sang Archdiocese of Capiz sa madugay na sini nga misyon sa pag-alagad sa Simbahan kag sa mga pumuluyo sang Capiz.
