ROXAS CITY – 100 porsyento sa mga local government units (LGU’s) sa probinsiya sang Capiz ang compliant sa direktiba ni Presidente Rodrigo Duterte pinaagi sa Department of Interior and Local Government (DILG) natuhoy sa pagpatigayon sang road clearing operations.
Ini ang ginpahayag ni DILG – Capiz Provincial Director John Ace Azarcon sang mainterview sang Bombo Radyo.
Suno kay Azarcon nga ang 16 ka mga kabanwahanan kag nagaisahanon nga siyudad sa Capiz ang nakasumiter sang ila nga compliance report nga nagapakita nga nagsunod ang mga ini sa nasambit nga direktiba.
Apang suno kay Azarcon, padayon ang validation sang DILG kaupod ang iban pa nga ahensiya sang gobyerno agud mahibaluan kun matuod nga nagasunod ang mga lokal nga gobyerno sa mandatu sandig sa ila ginsumiter nga report.
Matandaan nga ginmandu mismo ni Presidente Duterte ang road clearing operations ukon paghawan sa mga dalanon ilabi na sa mga sidewalk nga ginasakop na sang mga balay, establisyemento, kag iban pa nga istruktura.
