Kumpiskado sang mga katapo sang Roxas City Police Station ang pila ka mga palupok nga ginapangbaligya sang indi otorisado nga mga manugbaligya sang palupok sa Barangay Cabugao, Roxas City, Capiz.
Sa nakuha nga impormasyon sang Bombo Radyo nagikan sa Roxas City PNP, ginapahayag nga samtang nagapatigayon sang inspection ang mga kapulisan, nakakumpiskar ini sang mga palupok nga ginakalakipan sang 2 ka mga kinadena nga libintador, 5 ka putos nga mga libentador nga wala sang label, 40 nga candle bomb, kag 17 ka mga whistle bomb.
Nahibaluan nga ginturn-over na sa FESAGS Section sang Roxas City PNP ang mga nakumpiskar nga mga palupok para sa nagakaigo nga disposisyon.
Panugyan naman sang mga otoridad sa mga otorisado nga nagabaligya sang palupok, mag-preparar sang fire extinguisher, balde nga may tubig kag balas, kag indi pagkalimtan magbutang sang karatula nga may mga pahanumdum agud malikawan ang mga posible nga magluntad nga insidente.
