Nagapabilin nga ‘emotionally shocked’ ang mga pumuluyo sang Australia matapos ang natabo nga mass shooting sa Bondi Beach sa eastern suburb sang Sydney, New South Wales, Australia sang Disyembre 14, 2025.
Ang mga suspek mag-amay nga nagapang-edaron sang 50-anyos kag 24-anyos nga mga Pakistani.
Sa interview sang Bombo Radyo kay Denmark Suede, Bombo International Correspondent sa Australia, iya ginpahayag nga indi anad ang mga tawo sa lupok sang armas rason nga nakugmat kag ginpangkulbaan ang mga ini.
Suno kay Suede, sa sulod sang tinalikdan nga 29 ka tuig, amo naman ang una nga kahigayunan nga may napatay nga mga tawo sa indi magnubo sa tatlo.
Pahayag niya, natabo ang mass shooting sang tion nga may nagaselebrar nga mga Hudyo sang ‘Hannukah Festival’ nga isa ka selebrasyon sang kadalag-an.
Nahibaluan nga mga Pakistani muslim ang mag-amay nga nagpangluthang sa lugar kag mismo ang bahin lang sang nagaselebrar sang okasyon ang ginpuntirya sang mga ini.
Nagdangat naman sa 16 tanan ka mga indibidwal, lakip na ang amay nga suspek ang napatay kag nagapabilin naman sa nagkalain-lain nga bahin sang ospital sa Sydney ang 27 pa ka mga nagkalapilasan sa nasambit nga insidente.
Samtang, ginsiling man sang natungdan nga wala pa sa subong sang may narekord ang Consulate General of the Philippines in Australia nga mga Pilipino nga nadalahig sa amo nga mass shooting kag padayon man ang ila nga pagpakig-angut sa mga Pilipino nga yara sa amo nga lugar.
Interviewed by Bombo Sunnie Mae Constantino Batencila
