Padayon ang field monitoring kag inspection sang Department of Environment and Natural Resources (DENR) Capiz sa mga ginpatukod nga Small Water Impounding System (SWIS) sa nagkalain-lain nga barangay sa probinsya agud masiguro ang insakto nga implementasyon kag functionality sang mga proyekto.
Sa interview sang Bombo Radyo kay Dr. Ernest Federiso, Capiz Provincial Environment and Natural Resources Officer sang DENR Capiz, iya ginpahayag nga importante ang SWIS sa pagtipig kag pag-conserve sang tubig, ilabi na sa pagsuporta sa mga aktibidad sang National Greening Program kag sa mga kinahanglanon sang komunidad.
Lakip sa mga gin-monitor kag gin-inspect ang ginpatukod nga SWIS sa Brgy. Olalo, Pilar; Brgy. Agloloway, Jamindan; Brgy. Agustin Navarra, Ivisan; Brgy. Bayuyan, President Roxas; kag Brgy. Blasco, Pilar.
May 20-cubic-meter capacity ang pila sa mga SWIS nga ginpatukod sa idalom sang DENR Capiz.
Ginpaathag ni Federiso nga ang padayon nga monitoring kag inspection importante agud masiguro nga ang mga proyekto nagahatag sang benepisyo sa kabarangayan kag sa mga komunidad nga ila ginaserbisyuhan.
Kabahin ini sang nagapadayon nga soil and water conservation initiatives sang DENR Capiz para sa mas maayo nga pagdumala kag pagpreserbar sang natural resources sang probinsya.
