Misis, nabisto ang pagpangluib sang iya bana pinaagi sa ‘toothbrush’

Sa subong nga panahon nga moderno na ang teknolohiya, indi lang cell phone ukon Closed Circuit Television (CCTV) ang makatukib sang mga sikreto sa panimalay.

Isa ka smart electric toothbrush ang makabig nga silent witness sa isa ka kaso sang pagpangluib, isa ka insidente nga nagapamatuod nga bisan ang pinakagamay nga gadget ang mahimo magbuyagyag sang pinakadaku nga sikreto.

Suno kay Paul Jones, isa ka beterano nga private inves­tigator sa United Kingdom, nagpalapit sa iya ang isa ka ginang nga may panagupnop­ sa hulag sang iya nga bana. Ang pamilya sang nasambit nga ginang ang nagagamit sang smart electric toothbrush nga may app nga nakakonekta sa smartphone agud matutukan kun ano sila ka masami magsipilyo ilabi na ang ila nga mga kabataan.

Apang sa iya regular nga pag-check sang app, may natalupangdan ini nga indi tugma sa ila nga schedule bilang pamilya.

Nakit-an sang ginang nga kada Friday morning, sa mga oras nga dapat yara sa eskwela ang iya mga anak kag sila ang yara sa trabaho, may na-record ang app nga aktibidad sang toothbrush sa balay. Sang una, wala ini ginsapak sang ginang sa pagdumdom nga posible error lamang.

Apang samtang nagadugay, nangin maathag ang pattern: kada Biyernes sang aga, may nagagamit sang toothbrush nga dapat wala didto sa ila balay sa amo nga oras.

Matapos ginsiguro nga wala sang rason para may magga­mit sang toothbrush sa amo nga mga oras, ginkompronta niya ang iya nga bana. Hugot naman ang pagpanginwala sang lalaki kag ginsiling nga ara siya sa trabaho.

Apang ang app may maathag nga rekord: oras, petsa, kag lokasyon sang paggamit.

Sa bulig sang imbestigasyon ni Jones, natukiban nga sa kada wala sang tawo sa balay, sikreto nga nagapauli ang mister agud makigkita sa iya katrabaho sa ila mismo balay. Ang toothbrush, nga automatic nga naga-record sang kada paggamit, ang nagbuyagyag sang kabutigan.

Dugang pa ni Jones, sa panahon subong, ang mga smart device kasubong sang toothbrush, refrigerator, pet feeder kag iban pa ang may ikasarang nga magtipon sang impormasyon nga mahimo gamiton sa mga seryoso nga isyu kasubong sang pagpangluib.

Ang amo nga insidente pamatuod nga sa modern nga panahon, bisan ang pinakasimple nga gadget ang mahimo nga magbuyagyag sang kamatuoran.