ROXAS CITY – Karsel ang ginsudlan sang isa ka misis matapos ginbuno ang nakainuman nga mister sa sulod sang ila balay sa Barangay Dinginan, Roxas City.
Padayon nga ginabulong sa ospital ang biktima nga si Rolly Ballos 48-anyos nga nag-angkon sang pilas sa likod samtang yara sa gihapon sa presuhan ang misis nga ginkilala kay Emily Ballos.
Antes ang hitabo, magkaupod pa ang mag-asawa nga nag-inum sa balay kalakip ang ila mga kabataan.
Yara na sa kainitan sang ila pag-inum ang magpamilya sang hinali nga makaangkon sang mainit nga pagbayluhanay sang tinaga bangud sa wala nakasugtan nga isyu.
Hinali nga ginkuha sang misis ang kutsilyo kasunod sang pagbuno sa nagatalikod nga mister.
Gilayon nga nagpangayo sang bulig ang mga anak sang mag-asawa sa ila kaingud balay tobtob nag-abot ang mga barangay tanod nga amo ang nagdala sa biktima sa ospital.
