Ginbasura sang Quezon City Regional Trial Court (QC RTC) ang motion for inhibition ukon voluntary recusal nga gin-file ni Vice President Sara Duterte.
Sa order nga may petsa Setyembre 14, ginpahayag ni QCRTC Branch 98 Presiding Judge Maria Angelica De Ramos nga wala sang merito ang motion ni Duterte.
Suno sa korte, indi maathag kag indi maka-engganyo nga ebidensya sang actual bias, prejudgment nga makapaduha-duha sa impartiality sang judge.
Sa iya motion nga gin-file sang Setyembre 10, gin-akusaran ni Duterte ang korte nga ginabuligan sini ang prosecution sa pag-establisar sang probable cause matapos nga ginmanduan ang prosecution nga magpasa sang digital evidence nga wala nalakip sa ila una nga submission.
Suno kay Duterte, ang indi paglakip sang digital evidence mahimo nga mangin seryoso nga kakulangan bangud ang alegasyon sang prosecution nga may grave threats pinaagi sa paggamit sang live streaming services wala sang basehan nga ebidensya.
Isa pa sa rason nga ginpahayag ni Duterte amo nga dapat mag-recuse ang judge bangud siya kag ang iya anak gin-appoint sang Presidente, nga ginakabig ni Duterte nga iya political opponent.
Samtang, ginsabat sang prosecution nga ang mga rason nga ginpresentar para sa inhibition ukon recusal naghalin lamang sa adverse ruling sang korte.
Suno sa prosecution, wala man sang una nga pagpamatok si Duterte sa pag-assign sang iya kaso sa amo nga korte.
Ginpahayag man sang prosecution nga ang mando sang korte nga magpasa sang digital evidence wala nagakahulugan nga ginabuligan sini ang prosecution.
Suno sa prosecution, ang digital evidence nga ila ginpresentar amo ang ila lamang kopya kag wala ini anay pisikal nga ginpasa agud mapreserba ang integridad kag availability sang ebidensya.
Ginpanginwala man sang prosecution ang alegasyon ni Duterte nga may bias ang judge.
Suno sa ila, ang pag-appoint sa isa ka judge wala nagakahulugan nga may yara ini nga political obligation.
Sa iya ruling, ginpahayag sang QC RTC nga wala sang ebidensya nga nagasuporta sa alegasyon nga nagapabor ang korte sa prosecution.
Ginpahayag man sang korte nga ang pag-appoint sang Presidente sa isa ka judge wala nagakahulugan nga mangin political representative ini.
Sa isa ka statement, nagsiling ang abogado ni Duterte nga si Atty. Paul Lawrence Lim nga gamiton sang Vice President ang tanan nga available remedies matapos gin-dismiss sang korte ang ila motion.
Suno pa kay Lim, nakabaton man sila sang order sang korte nga nagamando sa duha ka partido nga istrikto nga tumanon ang sub judice rule kag likawan ang pagtalakay sa publiko sang merits sang kaso.
