ROXAS CITY – Ginkawat sang wala pa makilala nga persona ang isa ka motorsiklo sa La Frontera Subdivision, Brgy. Mongpong, Roxas City.
Sa pagpakig-angut sang Bombo Radyo kay Marco Niccolo Acielo, tag-iya sang motorsiklo, ginsiling sini nga nakapark ang iya motorsiklo sa guha sang ila puloy-an kag yara pa ini sang iya gintsekyar takna 12:00 sang kaaganhon.
Apang, sa iya pagguha alas-6:30 sa aga, agud magpadulong sa trabaho, ginkakibot nalang sini nga wala na ang amu nga salakyan, kalakip ang iya helmet.
Nagaduag rosas nga may itom ang Mio 125 nga motorsiklo kag may plate number nga 509FCR, samtang puti naman ang helmet sini.
Ginparekord naman ni Acielo sa kapulisan ang insidente kag nagapanawagan nga kun sin-o man ang makakita ukon mabaligyaan, palihog magreport gilayon sa kapulisan.
