Ginpaidalom sa urgent safety review sang Department of Transportation ang tanan nga major airport terminals sang Ninoy Aquino International Airport kasunod sang insidente nga natabo sang damlag lang.
Matandaan nga nagdiretso sa passenger zone sang NAIA Terminal 1 ang Sports Utility Vehicle nga ginkapatay sang duha ka tawo lakip na ang isa ka bata.
Kaina sang aga, nagpatigayon sang inspeksyon si DOTr Secretary Vince Dizon sa NAIA Terminal 1 sa diin may mga pagbag-o sa traffic flow kag integrity sang safety installations.
“Napansin niyo, unang-una yung ating traffic flow, bago na hindi na tayo nakatutok katulad nung dati. So I think that’s a major development…Nakakaulungkot nga na kailangan natin dumaan sa napakabigat na trahedya para baguhin natin ‘to so kailangan talaga baguhin natin,” suno kay Sec. Dizon.
Isa sa mga ginbag-o pa amo ang pagpatuman sang parallel parking ukon drop-off system sa NAIA Terminal 1 kag 2 sa diin katuyuan sini nga ma-improve ang traffic management kag passenger safety.
Ang critical component sang safety review amo ang inspeksyon sang bollards ukon protective barriers agud malikawan nga makasulod ang salakyan sa pedestrian zones.
Nagmando ang natungdan sang maid-id nga pagtsekyar sang tanan nga airport terminals agud mahibaluan ang kondisyon sang mga naga-eksister na nga bollards.
