Roxas City – Mahimo nga maka-parehistro ang mga Filipino sa national ID system suno sa Philippine Statistics Authority (PSA) sa Hulyo 2020.
Ginpahayag ni Philippine Statistic Authority Officer –Capiz head Engineer Frankie Dordas nga target sang ahensya nga ma-rehistro ang tanan nga mga Overseas Filipino Workers sa tuig 2021.
Suno kay Dordas nga ginsuguran na sang gobyerno ang pilot testing para sa national ID system sa diin sang nagligad nga Setyembre 2 ginsuguran na ang ang implementasyon sang Philippine ID System.
Ginpahayag ni Dordas nga tuyo sang laye nga makahimo sang isa na lamang ka official identification card agud ma-connect ang tanan nga mga government-issued IDs para sa tanan nga mga Filipino.
Ang nasambit nga national ID, pagatawgon nga “Phil-ID” kag iga-isyu sa tanan nga mga residente sa Pilipinas.
Dugang pa ni Dordas pinaagi sa paggamit sini mangin mahapos kag mapadasig na ang transaksyon sang mga pumuluyo.
Gin-athag pa sini nga wala man sang kinalain ang mga impormasyon nga ibutang sa ID sa personal data sang nagkalain-lain nga ahensya sang gobyerno.
Nahibaluan nga magalawig ang pilot test registration tubtob sa masunod nga tuig sa diin minilyon nga mga Filipino ang sakup sang national ID system sa pagtakop sang Duterte administration.
Matandaan nga ginpirmahan ni Presidente Rodrigo Duterte ang Philippine Identification System Act sang Agosto sang nagligad nga tuig.
