ROXAS CITY CAPIZ — Madamo nga mangunguma halin sa nagkalain-lain nga kabanwahanan sa probinsya sang Capiz ang nagtambong sa paglunsyar sang programa nga “Benteng Bigas para sa mga Mangunguma” nga ginpatigayon sang National Food Authority (NFA) Capiz upod ang Department of Agriculture–Capiz kag Food Terminal Incorporated Kahapon nga adlaw sa NFA Bolo, Roxas City.
Sa interview sang Bombo Radyo Roxas kay Mr. Andy Ostan, Acting Branch Manager sang NFA- Capiz, ginpahayag niya nga pinaagi sa sini nga programa, ang mga kwalipikado nga mangunguma nga rehistrado sa Registry System for Basic Sectors in Agriculture (RSBSA) mahimo makabakal sang bugas sa presyo nga ₱20 kada kilo.
Suno sa iya, kwalipikado diri ang mga RSBSA-registered nga mangunguma sang humay nga may duta nga duha (2) ka ektarya ukon mas gamay, kag mga RSBSA-registered nga farm workers. Kinahanglan lamang magpakita sang RSBSA ID, QR Code kag isa ka valid ID halin sa gobyerno antes makabakal sa mga bodega sang NFA.
Pahayag pa sini, may alokasyon man nga 10 kilo kada bulan para sa tagsa ka kwalipikado nga benepisyaryo, kag mahimo makabakal tubtob 50 kilo ukon katumbas sang lima (5) ka bulan nga alokasyon sa isa ka balaligyaan.
Para naman sa may mga representante, kinahanglan nga dal-on lang ang RSBSA ID Number, QR Code kag valid ID sang benepisyaryo. tubtob lima (5) lang ka ID ang pwede madala sang isa ka representante, kag tag pulo ka (10) kilo lang nga bugas ang pwede mabakal kada RSBSA ID.
Ang pagbayad sa bugas ginapatuman lamang pinaagi sa cash payment, kag ginapanugyan ang mga benepisyaryo nga magdala sang eco-bag kon magbakal sang bugas.
Dugang pa sini, ginpahayag sang NFA nga ang programa nagatuyo nga mangin bulig sa mga mangunguma kag pamilya nga apektado sang mahal nga presyo sang bugas sa merkado, bangud ang NFA lamang ang supplier sang ini nga P20 kada kilo nga bugas.
Pinaaagi sa sini nga programa, ang mga mangunguma nga luyag magbakal sang P20 nga bugas mahimo maka-avail sini sa NFA compound sa Bolo, Roxas City, nga bukas adlaw-adlaw magluwas lang kon Sabado, Domingo kag holidays.
Samtang suno naman sa Food Terminal Incorporated ang ila kontrata para sa distribusyon magalawig tubtob Nobyembre, kag para sa Disyembre, padayon pa nga ginaproseso.
