Nagpatigayon sang meat inspection ang National Meat Inspection Service (NMIS) Region VI kag City Veterinarian Office sa nagkalain-lain nga mga baligyaan sang karne sa Roxas City.
Kabahin ini sang padayon nga monitoring kag inspeksyon sang mga otoridad agud masiguro nga ang mga karne nga ginabaligya sa merkado kag iban pa nga establisyemento amu ang malimpyo, luwas, wala sang balatian, kag angay para sa pagkonsumo sang tawo.
Ginpahayag man nga ginatutukan sang inspeksyon ang mga karne nga naghalin sa mga kasapatan nga gin-ihaw sa slaughterhouse.
Ginapaathag sang mga otoridad nga importante nga ang mga karne nakalab-ot sa husto nga proseso sang meat inspection kag may opisyal nga meat inspection stamp ukon tatak sang slaughterhouse antes ini ibaligya sa publiko.
Paagi sa sini nga inisyatibo, ginapanalipdan sang NMIS kag City Veterinarian Office ang kaayohan kag kaluwasan sang mga konsumidor, samtang ginapaathag man sa mga nagabaligya sang karne ang importansya sang pagsunod sa mga patakaran kag regulasyon sa meat safety.
Ginaagda man ang publiko nga magbakal lamang sang karne nga naghalin sa lehitimo nga source kag may nagakaigo nga marka ukon tatak sang inspeksyon agud malikawan ang posible nga peligro sa ikaayong-lawas.
