Gin-anunsyo ni Deputy Speaker kag Antipolo Representative Ronaldo Puno, chairman sang National Unity Party (NUP) nga indi malipayon ang pila ka mga katapo sang partido sa pagpamuno ni House Speaker Bojie Dy bangud sa padayon nga atraso sa pag-release sang pondo para sa district projects.
Suno kay Puno, nadismaya ang pila ka mga kongresista matapos matukiban nga ginmarkahan sang Department of Budget and Management (DBM) ang pila ka pundo para sa mga proyekto sang distrito nga “for later release,” nga nagtuga sang kabalaka sa pagpatuman sang mga programa nga gintuyo para sa ila mga constituents.
Ginpahayag man sini nga istoryahan sang mga katapo sang NUP sa tion sang congressional break kun bala magapabilin sila sa House Majority ukon maghalin sa ila pwesto sa pamunuan sang Kamara bilang sabat sa nasambit nga isyu.
Ginklaro ni Puno nga separado sa ila panindugan ang isyu sang pondo angut sa impeachment case batok kay Vice President Sara Duterte.
Ginhatagan niya sang importansya nga ang luyag lamang sang ila grupo amo nga masiguro nga ang anuman nga tikang may kaangtanan sa nasambit nga kaso ang may yara sang bastante kag solid nga basehan.
