Ginapabakod sang Pontevedra Municipal Police Station (MPS) ang ila seguridad paagi sa padayon nga pagpatuman sang Oplan Bakal-Sita, ilabi na sa mga videoke bar kag iban pa nga lugar sang kalingawan.
Sa idalom sang pagpanguna ni PCPT Maria Fe T. Umiten, OIC, nagapatigayon ang mga kapulisan sang police presence kag inspeksyon sa mga lugar sang kalingawan bilang kabahin sang ila tikang sa pagpugong sa pagdala sang armas, patalom, kag iban pa nga delikado ukon ginadumilian nga mga butang.
Una nga katuyuan sang operasyon nga masiguro ang kalinong kag seguridad sang mga nagakalingaw, agud malikawan ang posible nga pag-inaway, krimen, kag iban pa nga insidente nga mahimo matabo bangud sa presensya sang armas ukon patalom.
Ginapanawagan sang Pontevedra MPS ang publiko nga makig-angut sa kapulisan kag magsunod sa yara sa bisa nga mga kasuguan kag ordinansa.
Paagi sa padayon nga police visibility kag kooperasyon sang komunidad, handum sang kapulisan nga mangin masadya, malinong, kag luwas ang gab-i kag ang pagpauli sang tagsa ka pumuluyo.
