Indi magnubo sa P6.5 billion ang kinahanglanon agud maumpisahan ang konstruksyon sang mega dam project sa probinsya sang Capiz antes matapos ang termino ni President Ferdinand Marcos Jr. sa 2028.
Gin-request na mismo sang National Irrigation Administration (NIA) ang nasambit nga balor nga malakip sa 2027 national budget para sa ginaduso nga Panay River Basin Integrated Development Project (PRBIDP).
Suno kay NIA-Western Visayas Manager Engr. Jonel Borres, nagapakig-angot na ang NIA Central Office sa Department of Economy, Planning and Development (DEPDev).
Una na nga nagpabutyag sang paglaum si Capiz Governor Fredenil Castro nga matuman ang proyekto sa idalom sang Marcos administration.
Sa subong nga tuig, may yara lang sang P420 million budget ang NIA regional office halin sa P4.5 billion nga gin-request sini para sa nasambit nga proyekto.
Pahayag ni Borres, ang nasambit nga kantidad ang gingamit sa pre-construction phase sang proyekto.
Ini ang ginalakipan sang updated feasibility study kag detailed engineering design nga malapit na lang matapos.
Ang PRBIDP ang gin-desinyo bilang mega dam project nga magabulig sa 15 ka mga banwa sa Capiz sa diin nagaagi ang Panay River.
