Ginabulubanta nga yara sa P708,000 balor sang mataas nga sahi sang marijuana ukon kush ang nasabat sang Bureau of Customs (BOC) sa isa ka pantalan sa Clark, Pampanga.
Suno sa BOC, gindeklarar nga mga vintage pants kag jeans ang mga yara sa kahon sang nag-agi ini sa isa ka x-ray machine kun sa diin may nakitaan nga mga indi normal.
Gilayon nga ginbuksan sang mga otoridad ang nasambit nga package kag nasiplatan sang mga ini ang halos 472 nga gramo sang marijuana.
Madasig man nga napakig-angutan ang ahensya sa Philippine Drug Enforcement Agency (PDEA), Philippine National Police – Aviation Security Group, National Bureau of Investigation Pampanga District Office, Department of Justice, kag opisyal sang Brgy. Dau sa Mabalacat City agud maaksyunan gilayon ang insidente.
Samtang, nagpaguwa gilayon sang warrant to seize and detain the shipment ang BOC pagkatapos maguwa ang resulta sang mga ginpadala nga samples sang ahensya sa PDEA.
