Pagabusision na sa masunod nga hearing sang House Committee on Justice, ang kaundan sang income tax returns ni Vice President Sara Duterte kag sang iya bana nga si Atty. Manases Carpio, matapos ginkumpirma sang komitiba nga ginpasa na ini sa Bureau of Internal Revenue.
Suno kay Justice Committee Chairperson Rep. Gerville Luistro, nadulaan na sang importansya ang petisyon nga ginpasaka ni Carpio sa Quezon City Regional Trial Court sang Abril 13 nga tuyo kuntani nga punggan ang komitiba sa pagkuha kag pag-publish sang ila ITR.
Matandaan nga ginreklamo ni Carpio ang subpoena nga ginpaguwa sang komitiba batok kay Bureau of Internal Revenue Commissioner Charlie Mendoza nga naga-require sa iya nga magsumite sang tax documents may kaangtanan sa ila mga negosyo.
Ginpabutyag man sini nga isa ini ka paglapas sa Data Privacy Act kag exceedingly overstretched, ilabi na nga ang termino ni Duterte nagsugod lamang sang Hunyo 30, 2022.
Ang nasambit nga Income Tax Returns ang pormal nga ipresentar sa committee hearing sa Abril 22 ukon buwas nga adlaw.
Ginalauman man ni Luistro nga maistoryahan sang Bureau of Internal Revenue ang mga limitasyon angut sa confidentiality sang nasambit nga mga dokumento.
Samtang, gin-athag man sang mamalidha nga nagpanawagan lamang ang komitiba sang report gikan sa Anti-Money Laundering Council (AMLC) para sa natalana nga hearing sa buwas nga adlaw angut sa alegasyon sang wala mapaathag nga manggad batuk sa Bise Presidente.
