Nagadouble time ang Department of Environment and Natural Resources ukon DENR Capiz sa ginaduso nga mangin protected seascape ang Tucad Reef sa banwa sang Pilar.
Sa interview sang Bombo Radyo kay Dr. Ernest Federiso, Officer-in-Charge sang DENR Capiz, iya ginpahayag nga importante ang Tucad Reef bangud daku ang importansya sini maritime biodiversity kag pangisdaan sa probinsya.
Suno kay Federiso, may yara ang Tucad Reef sang 125.24 hectares nga seagrass kag 110.16 hectares nga coral reefs, nga amo ang ginapuluy-an sang mga isda iban pa nga mga yamang dagat.
Dugang pa sang natungdan, padayon ang ila pagpakig-angut sa mga stakeholders sa rehiyon kag kay Congressman Howard Guintu agud masulong ang proposal agud mangin opisyal na makabig nga protected seascape ang Tucad Reef.
Ginpahayag man sini, nga nakahimo na sila sang Protected Areas Sustainability Assessment ukon PASA agud mausisa ang ecological importance sang reef kon bala nagakadapat ini nga mangin kabahin sang protected area system.
Nagalaoam naman ini nga ang Tucad Reef makahatag sang benepisyo sa pangisdaan kag turismo sa Pilar kag sa bilog nga probinsya sang Capiz.
