ROXAS CITY, CAPIZ- Isa sa mga pagapondohan nga re-development projects ang pagkaayo sang Villareal Stadium sa Roxas City, para sa plano nga pag loan sang P1 billion sa Land Bank of the Philippines sang provincial government sang Capiz.
Sa interview sang Bombo Radyo kay Matthew James Viterbo, Provincial Sports Coordinator sang Capiz, iya ginpahayag nga sang tuig 2022 pa nga ginplanuhan nga kay-uhon ang nasambit nga pasilidad partikular ang sa bahin sang mga bleachers ukon pungku-an sang mga ini.
Suno kay Viterbo, may mga damage na ang nasambit nga bleachers sa diin nga nakitaan na ini sang peligro. Pila nalang ka tuig kag may posibilidad na ini nga marusdak kun indi gilayon nga makay-o.
Pahayag niya, ang pondo nga gin-alokar nagabalor sang P350 million para pa lamang ina sa bleacher.
Nahibaluan nga ang bleacher, mahimo na nga mangin dual purpose – commercial building ang pihak nga bahin, athletes quarters ang pihak.
Magluwas sa pag-repair sang Villareal Stadium, plano man sang provincial government nga magbakal sang adjacent land sa Brgy. Dinginan, Roxas City para sa bag-o nga Capiz Provincial Capitol nga nagabalor sang P300 million. Nagabalor naman sang P100 million para sa development sang bag-o nga Capiz Provincial Capitol kag construction sang Roxas Memorial Provincial Hospital sa Brgy. Lanot, Roxas City nga nagabalor sang P250 million.
Dugang pa ni Viterbo, ang nasambit nga plano nga pag-loan ang wala naman ginpamatukan sang mga officials kag magaagi pa ini sa duha pa ka mga session.
Ginsigurado naman ni Viterbo nga ang nasambit nga loan ang pagahawidan sang bangko kag indi sang provincial government.
Interviewed by Bombo Sunnie Mae Constantino Batencila
