ROXAS CITY – Nagapadayon sa karon ang monitoring sang Municipal Disaster Risk Reduction and Management Council (MDRRMO) kasunod sang natabo nga soil erosion sa Sitio Mohon, Barangay Sta. Rita, banwa sang Dumalag, Capiz.
Madasig nga nagresponde ang MDRRMO kasunod sang pagpanawag ni Punong Barangay Aida Foscalbo angut sa natabo nga erosion nga nga nagtuga sang pagkabalaka sa mga residente sa lugar.
Gilayon nga nagpatigayon sang clearing operation ang ahensiya kaupod ang pila ka mga responding units bangud sa pagkatiphag sang duta rason nga wala gilayon nakaagi ang mga salakyan.
Sa karon, passable na sa tanan nga sahi sang salakyan ang nasambit nga lugar apang nagapadayon ang monitoring diri bangud sa posibilidad sang liwat nga pagkatiphag sang duta.
Mahibaluan nga ang nasambit nga soil erosion ang bangud sang mamunog nga pag-ulan sa probinsiya.
Wala man sang narekord nga kahalitan ukon mga napilasan sa nasambit nga insidente.
