Gindakop sang mga katapo sang Bureau of Immigration ang duha ka dumuluong sa isa ka manhunt operation sang tinalikdan nga Sabado, Hulyo 27, sa Tuba, Benguet kaangut sang isa ka Chinese na dalahig sa isa ka Philippine Offshore Gaming Operator sa Bamban, Tarlac.
Ginkilala sang ahensya ang mga suspek nga sanday Wang Keping, 35- anyos kag Khuon Moeurn, 37-anyos, isa ka Cambodian cetizen.
Suno kay BI Intelligence Division chief Fortunato Manahan Jr., ginhiwat ang operasyon kasunod sang impormasyon nagikan sa Presidential Anti-Organized Crime Commission (PAOCC) angut sa relasyon sang babayi nga Chinese sa POGO.
Nagpaguwa sang mission order si BI Commissioner Norman Tansingco batuk sa babayi nga Chinese matapos ini nga maibalita nga nagapanago sa Tuba.
Ginpahayag ni Manahan sang nag-abot ang ini sa nasambit nga lugar kag naabtan na lamang sang mga ini ang duha ka dumuluong pero ang ila nga target nga Chinese ang wala nila nakita sa amo nga lugar.
Diri nahibaluan sang BI ang identity sang mga dumuluong nga si Moeurn, nga isa gali ka undocumented kag overstaying alien matapos ini nga wala nagpakita sang mga nagakaigo nga dokumento. Nagpakita lamang si Moeurn sang laragway sang iya nga Cambodian passport nga valid tubtob Agosto 2020 lamang.
Dugang naman nga pahayag ni Manahan nga may working visa si Wang apang nagapangatubang gihapon ini sa mga kaso bangud sa pagtago sini kay Moeurn.
Ginpadangat na ang amo nga mga dumuluong sa Maynila para sa booking kag magapabilin ang mga ini sa PAOCC samtang nagahulat sang deportation proceedings.
