ROXAS CITY – Indi na bag-o sa gobyerno sang Taiwan ang ginahimo sang China nga akto sang pagpangsakup.
Ini ang ginpahayag ni Dr. Reynand Dumala-on, Bombo International Correspondent sa Taiwan, sang mainterview sang Bombo Radyo.
Suno kay Dumala-on, nagakahinabo ang pagpangsakup sang China kapin 20 ka tuig na ang nakaligad tubtob sa karon, kag indi ini sa pisikal lamang nga pamaagi, kundi sang damlag lang, gingamit sang China ang pagpalapta sang ‘disinformation’ ukon fake news nga isa ka sahi sang istratehiya, nga magpati ang pumuluyo sang Taiwan sa Chinese government.
Dugang pa ni Dumalaon nga nagapabilin nga nakadepensa ang Amerika sa Taiwan pinaagi sa pagpadala sang ‘fact checkers’ agud mapakigbatuan ang disinformation.
May mga residente man suno diri nga nagadampig sa China, apang kadam-an sa mga pumuluyo ang handa nga ipakigbato ang ila pungsod.
Sa pihak sini, nagapabilin nga ginapakigbato sang Taiwanese government ang demokrasya kag nagapangisog nga sa tion pagatandugon sang China, indi sila magpangduha-duha nga magabalos.
