Ginsiling ni Cagayan de Oro City 2nd District Representative Rufus Rodriguez nga paglapas sa Universal Health Care Act ang pagsaylo sa national treasury sang P89.9 billion nga pondo sang Philippine Health Insurance Corporation ukon PhilHealth.
Bangud sini, ginplastar ni Rodriguez ang Resolution No. 1903 nga nagaduso nga imbestigahan sang Kamara ang nasambit nga tikang kadungan sa mandato sang Department of Finance (DOF).
Ginhatagan man sang pagtamud ni Rodriguez nga klaro ang nakabutang sa Universal Health Care Act nga ang sobra sa pondo sang PhilHealth, ang pagagamiton agud madugangan ang benepisyo sang mga programa sini kag agud mabuhinan ang kontribusyon sang mga miyembro.
Samtang, ang pagsaylo naman sang PhilHealth funds paglapas man sa duha pa ka layi nga RA No. 11467 kag RA No. 10963 nga nagamandato nga ang kita nagikan sa tobacco excise taxes, e-cigarettes kag sweetened beverages kinahanglan nga gamiton sa benepisyo sang mga miyembro sang PhilHealth.
Magluwas sini, nagpanawagan si Rodriguez kay Pangulong Ferdinand “Bongbong” Marcos Jr., nga amyendahan ang pagbalik sang P89.9 billion nga pondo sa PhilHealth agud mahatagan sang hustisya ang 104 million nga miyembro sini.
