ROXAS CITY – Nagapati ang passer sang bag-o gid lamang nagguwa nga resulta sang Civil Engineering Licensure Examination (CELE) nga ang liyabe sa iya pagkapasar amu ang Pagtimakas kag Pagtuo.
Ini ang ginpahayag ni Engr. Paul Christian Alado, sang President Roxas, isa sa mga nangin madinalag-on sa nasambit nga pasinawan, sang mainterview sang Bombo Radyo.
Suno diri, nagtimakas ini nga mangin isa ka civil engineer sang tion nga nawasak sang bagyong Yolanda ang ila balay kun sa diin nareyalisar sini nga luyag niya mapatindugan sa ulihi sang mabakod kag mapag-on nga balay ang iya pamilya agud indi na madali-dali palid sang hangin ang ila atop.
Ginahalad man ni Alado sa iya Iloy ang iya pagkapasar bangud ini ang iya nangin inspirasyon sang tion nga nagpangatubang ini sang kabudlay sa pagtuon.
Nahibaluan nga Elementarya pa lamang si Alado sang nagtaliwan na ang iya Amay, rason nga dako gid ang iya pasalamat sa iya Iloy kag subong man sa iya mga utod nga nagsuporta sa iya agud maangkon ang kadalag-an sa pasinawan.
Mensahe sini sa mga napaslawan sa exam nga balido ang nabatyagan nila nga kasakit kag pagkadismaya, apang gamiton nila ini nga kapaslawan nga tikang agud mas mangin mabakod pa sa pag-atubang sa kabuhi, kag importante nga magpangamuyo agud gabayan sa pag-abot sang ila handum.
