Nagtipon ang nagkalain-lain nga stakeholders, mga tiglawas sang akademya, kag pribado nga sektor sa Capiz Government and Business Center (CGBC) sang Agosto 25, 2026, para sa preparasyon sang palaabuton nga implementasyon sang Maragtas Specialty Shop and Pasalubong Center.
Gin-organisar sang Gobyerno Probinsyal sang Capiz, sa idalom sang liderato ni Gobernador Fredenil H. Castro, ang sinapol paagi sa Provincial Local Economic Development and Investment Promotions Office (PEDIPO), sa pakig-angut sa Provincial Tourism, Cultural, and Affairs Office (PTCAO), Human Resource Management Office (HRMO), kag Provincial Information Office (PIO).
Fucos sang inisyatibo ang pagtukod sang strategic partnerships nga makasuporta sa mga local micro, small, and medium enterprises (MSMEs) sa Capiz kag makahatag sang mas daku nga oportunidad para sa pagbaligya kag pagpromote sang ila mga produkto.
Dala ang tagline nga “Where local pride becomes the gift you bring home,” ang Maragtas Specialty Shop and Pasalubong Center magaserbe bilang sentralisado nga plataporma para ipakita kag ipabugal ang mga lokal nga produkto, handicrafts, kag pagkaon nga nagarepresentar sang Capiz.
Ginhatagan man sang pagtamod sang proyekto ang pagpalig-on sang lokal nga sektor sang negosyo kag pagdasig sang dugang nga aktibidad pang-ekonomiya sa nagkalain-lain nga bahin sang probinsya.
Sa sinapol, isturyahan ang mga posible nga kolaborasyon sa tunga sang mga ahensya sang gobyerno, State Universities and Colleges (SUCs), kag pribado nga sektor agud masiguro ang husto kag madinalag-on nga paglunsar kag pagpadalagan sang pasilidad.
Suno kay PEDIPO Head Rio C. Garcia, importante ang aktibo nga partisipasyon sang nagkalain-lain nga sektor sa pagkompleto sang inisyatibo kag sa paghatag sang dugang nga gahum kag oportunidad sa mga lokal nga negosyante.
Samtang, sa katapusan nga bahin sang sinapol, nagsugod ang mga opisyales kag stakeholders sa paghimo sang pormal nga resolusyon nga magalakip sang mga operational nga polisiya, responsibilidad sang mga natungdan, kag opisyal nga mga pagsulondan para sa pagpatuman sang pasalubong center.
Ang resolusyon mangin importante nga legal kag administratibo nga pundasyon sang proyekto agud masiguro ang husto nga pagpatuman, pagpondo, pagdumala, kag malawig nga pagpadayon sang Maragtas Specialty Shop and Pasalubong Center bilang isa ka proyekto nga nagapabaskog sa lokal nga negosyo kag nagapromote sang Capiznon pride.
