Ginsikway sang Malacañang ang ginapanukala nga interim arrangement ni Senador Alan Peter Cayetano para sa temporaryo nga pagdumala sang Senado sa tunga sang nagapadayon nga isyu sa liderato sang mataas nga kapulungan. Ginpabutyag sang Palasyo nga padayon nila nga ginakilala si Sherwin Gatchalian bilang lehitimo nga lider sang Senado.
Suno kay Palace Press Officer Claire Castro, wala sang maayo nga epekto ang ginapanukala nga sistema kag posible lamang ini nga magdugang sang kalibugan sa operasyon sang Senado.
Sa proposal sang kampo ni Alan Peter Cayetano, ginapanawagan ang paggamit sang “dual-signatory” ukon duha ka pirma sa mga importante nga dokumento pareho sang vouchers, tseke, kontrata kag iban pa nga kinahanglanon sa operasyon sang Senado kag impeachment court.
Ginpahanumdom man sang Palasyo ang nagligad nga term-sharing agreement sa House of Representatives nga nalambot sa kontrobersiya, kag ginpahayag nga indi nila gusto nga matabo liwat ang pareho nga sitwasyon.
Gindugang pa sang Malacañang nga magapadayon sila sa pakig-angot lamang kay Gatchalian para sa mga opisyal nga transaksyon kag komunikasyon nga may kaangtanan sa liderato sang Senado.
