Ginkumpirmar ni Department of Justice (DOJ) Secretary Jesus Crispin “Boying” Remulla nga padayon ang imbestigasyon sang departamento sa pamilya Villar may kaangtanan sa ginaalegar maanomaliya nga infrastructure projects sa syudad sang Las Piñas.
Base sa impormasyon, ang kontraktor nga nagkuha sang mga proyekto para sa ila lugar sa Las Pinas amo ang pakaisa ukon ‘first cousin’ ni Senador Villar.
Suno kay Remulla, indi lang si Senador Mark Villar ang ginatumod sang imbestigasyon, kundi pati na sanday Senador Cynthia Villar kag Camille Villar.
Ang imbestigasyon ang base sa ginaalegar koneksyon sang pamilya Villar sa isa ka kontraktor nga nakakuha sang binilyon ka pesos nga balor sang mga proyekto gikan sa gobyerno, partikular sa ila nasakupan.
Nahibaluan nga ang kabug-usan nga balor sang mga proyekto nga ginatan-aw sang DOJ ginabulubanta nga masobra sa ₱18 billion lakip na ang mga proyekto sa flood control projects kag iban pa nga mga proyekto sa imprastraktura nga mahimo may kaangtanan sa korapsyon.
Sa subong, nagapadayon pa ang imbestigasyon kag pagkilala sa mga indibidwal ukon grupo nga may koneksyon sa nasambit nga mga proyekto.
